Description

සුදු හදුන් විශ්මිත ගුණ
සමේ වියළි බව නැති කරන සුදු හඳුන් ගාන්න – උෂ්ණ කාලවලදී ශරීරයේ දැඩි වියළි බවක් ඇතිවෙනවා. ඒ වගේම දාදිය බිබිළි හට ගන්නවා. එවන් අවස්ථාවලදී දාදිය බිබිළි නැති කරන්නත්, සමේ වියළි බව නැති කර හමට සිසිලක් ලබා දෙන්නත් සුදු හඳුන් ඇල් දියෙන් ගලගා ඒ සියුම් ද්‍රාවණය ඇඟේ ආලේප කරන්න. සුදු හඳුන්වල පවතින සිසිල් ගුණය නිසා දැඩි උෂ්ණ බවින් ශරීරය මුදන්නත් දාදිය බිබිළි ලප කැළල් ඉවත්කර ශරීරයට සිසිල් බවක් ලබා දෙන්නත් සුදු හඳුන් හොඳයි.
මසාජ්වලටත් සුදු හඳුන් – ඒ වගේම රූපලාවණ්‍ය කටයුතුවලටත් සුදු හඳුන් හොඳයි. සමේ අවපැහැය මකා රන්වන් පැහැයක් ලබන්න දිනපතා සුදු හඳුන් කුඩු රෝස වතුර සමඟ මිශ්‍ර කර ඇඟේ ආලේප කරන්න. රෝස මල් පැය කිහිපයක් වතුරේ දමා තැබීමෙන් රෝස වතුර හදා ගන්න පුළුවන්. සිංහල වෛද්‍ය ක්‍රමයේ විවිධ සුවඳවත් තෙල්වලින් කරන ප්‍රතිකර්මයක් තිබෙනවා “ඇරෝමා තෙරපි” නමින්. ඒ සුගන්ධවත් තෙල් අතර සුදු හඳුන් තෙල් ඉතාම විශේෂයි රූපලාවණ්‍ය කටයුතුවලට. සුදු හඳුන් තෙල් කොටසක් අරගෙන ඒ වගේ දෙගුණයක් තල තෙල් මිශ්‍ර කරලා එමඟින් ශරීරය සම්බාහනය කරන්නත් පුළුවන්. ශරීරයේ පිටතින් සම්බාහනය කිරීමෙන් හෘද රෝග, අක්මා රෝග සහ පෙණහලු ආශි්‍රත රෝගවලින් මිදෙන්නත් ඔබට පුළුවන්. ශරීරයේ පැහැය ලබන්නත් ඒ ක්‍රමවේදය ඉතාමත් සාර්ථකයි.

විසබීජ නසන සුදු හඳුන් – ඇතැම් රෝගීන්ගේ කාමරවල කොතෙක් සුවඳ දුම් ඇල්ලුවත් විෂබීජ විනාශ වන්නේ නෑ. උදාහරණ ලෙස පිළිකා රෝගීන්ගේ කාමරවල සහ තදබල ලෙස වමනය යෑම නිසා හටගත් විෂබීජ නාශනය කරන්න අමාරුයි. එවන් රෝගීන්ගේ කාමරවලට සුදු හඳුන් කුඩු දමා දුම් අල්ලන්න. එමඟින් ඕනෑම විෂබීජයක් විනාශ කිරීමේ හැකියාවක් පවතිනවා.
ඉක්කාවට සුදු හඳුන් හා තන කිරෙන් නස්නයක් – යමකුට ඉක්කාව හැදුනොත් සුදු හඳුන් ගලගා අරගත් කුඩු තනකිරි ටිකක් සමඟ මිශ්‍ර කර නස්න කරන්න. එය ඉක්කාවට ඉතාම ගුණදායකයි. ඒ වගේ තමයි උණ, අතීසාරය වැනි අවස්ථාවලදී තදබල ලෙස පීනස හටගන්නවා. එවන් රෝගීන්ටත් සෙම්ප්‍රතිශ්‍යා රෝගීන්ටත් දිය හැකි හොඳ ඔෟෂධීය පානයක් තමයි “ෂඩංග පානය” කියන්නේ. එය සාදාගන්නේ මෙහෙමයි. කලාදුරු අල, වියළි ඉඟුරු, ඉරිවේරිය, පත්පාඩගම්, සැවැන්දරා සහ සුදු හඳුන් ග්‍රෑම් 60ක් බැගින් අරගෙන එයට වතුර මිලිලීටර් 1920ක් මිශ්‍ර කර භාගයක් වන පදමට සිඳවා ගන්න. ඉන්පසු එය පීනස, සෙම්ප්‍රතිශ්‍යාව, උණ වැනි රෝගවලින් පෙළෙන අයට වරින් වර පානයට දෙන්න.ඒ වගේම තදබල ලෙස හිසේ රුජාව ඇති අයට සුදු හඳුන් ගලගා ඇල් දිය හා මිශ්‍ර කර රෙදි කැබැල්ලක ආලේප කර නළලෙ එළන්න. සුදු හඳුන්වල පවතින සිසිල් ගුණය නිසා හිසේ රුජාව ඉක්මනින් සුවඅතට හැරෙනවා.
ගැස්ට්‍රයිටිස්වලට සුදු හඳුන් කසායක් – ගැස්ට්‍රයිටිස් රෝගයෙන් පෙළෙන අය නිරන්තරයෙන්ම බඩ දැවිල්ලෙන් පීඩා විඳිනවා. එවන් තත්ත්වයෙන් මුදා ආමාශගත තුවාල සමනය කිරීමට සුදු හඳුන්වලින් හොඳ කසායක් සාදා ගන්නා පුළුවන්. සුදු හඳුන් කුඩා කැබලි කිහිපයකට කපාගෙන එයට වතුර කෝප්ප 8ක් දමා පත එකක් වනතුරු හොඳින් සිඳවා ගන්න. ඉන්පසු සිඳවාගත් සුදු හඳුන් කසාය උදේ පත භාගයක් සවස පත භාගයක් බැගින් පානය කරන්න. ගැස්ට්‍රයිටිස්වලට එය ඉතාමත් ගුණදායකයි. මේ කසායට වතුර පත 8ක් දානවා වෙනුවට හාල් පානු වතුර පත 8ක් දානවා නම් වඩාත් හොඳයි. හාල්පානු වතුර සාදාගන්නේ මෙහෙමයි. කැඩුණු කැකුළු හාල් ස්වල්පයක් වතුර පත අටක් දමා පැය 6ක් වසා තබා ඉන්පසු පෙරා ඒ වතුර සමඟ සුදුහඳුන් කැබලි තම්බා කසාය සාදාගන්න පුළුවන්.
මනස උණුසුම් කරන සුදු හඳුන් දුම – සුදු හඳුන් ඔෟෂධය මඟින් මනස ශාන්ත කළ හැකි බව අපි පර්යේෂණ මට්ටමෙන් පවා තහවුරු කරගෙන තිබෙනවා. ගැටලු හමුවේ මානසික අවසාදයෙන් පෙළෙන අයත්, නින්ද නොයෑමේ රෝග ලක්‍ෂණ ඇති අයත් සුදු හඳුන් කුඩු ඇස්ස කැපූ තැඹිලි ගෙඩියකට දමා ඇස්ස වසා රැයක් තබා උදේ සවස බොන්න.